ÑÇÖÞÉ«°É

Beth wnaeth eich ysbrydoli neu eich ysgogi i ddefnyddio'r offer/adnodd hwn? 

Roedd yr adnodd hwn eisoes yn fformat asesu dilys pan ymunais â’r modiwl, ond ar ôl ei ddefnyddio a gorfod sefydlu cylch dilynol, sylweddolais fod ffordd fwy effeithlon o’i ddefnyddio. 

Wrth ymuno â'r modiwl, crëwyd nifer o fyrddau trafod o dan ffolder ar gyfer pob goruchwyliwr (hyd at 10 goruchwyliwr yn y modiwl). Yna neilltuwyd grwpiau i bob bwrdd trafod, ond fe all myfyriwr gael ei neilltuo i fwy nag 1 grŵp a rhai myfyrwyr heb eu neilltuo i unrhyw un. Roedd hyn hefyd yn lot o waith wrth eu gosod, a phe byddai myfyriwr yn gadael neu’n symud grŵp, byddai'r holl wybodaeth flaenorol ar y bwrdd trafod hwnnw'n cael ei cholli. Roedd y system hon hefyd yn weledol gymhleth i staff a myfyrwyr, gan fod yn rhaid iddynt chwilio am eu goruchwyliwr, agor y ffolder honno, ac yna mynd at y byrddau trafod yr oeddent eisiau teipio ynddynt. 

Beth oedd eich nod wrth ddefnyddio’r offer/adnodd hwn? 

Symleiddio’r broses sefydlu, ac yn dilyn mân addasiad yn yr asesiad, symleiddio’r byrddau trafod fel mai dim ond 1 bwrdd oedd gan fyfyrwyr i ysgrifennu arno. Byddai hyn yn eu galluogi i wneud cysylltiadau rhwng y 4 pwnc astudio (Gofal Person-Ganolog, Gweithio mewn Tîm, Cydweithio Rhyngbroffesiynol ac Atebolrwydd Proffesiynol) a hefyd, roedd myfyrwyr yn aml yn canfod y gallai adnodd gefnogi pynciau lluosog, felly byddai cyflwyno unwaith yn lleihau llwyth gwaith mewn modiwl dwys iawn. 

Roeddem yn dal i fod eisiau gallu darparu canllaw i fyfyrwyr o ran cwblhau'r byrddau, yn ogystal â chwestiynau cychwynnol ar gyfer pob pwnc, er mwyn eu hannog i feddwl am dystiolaeth y maent eisiau edrych arni. Mae'r opsiwn testun wrth osod bwrdd yn ein galluogi i ddarparu'r ddau, nid yn unig yn llawlyfr y modiwl, ond ar frig y byrddau lle mae myfyrwyr yn mynd yn amlach, fel bod y wybodaeth ar gael yn haws wrth wneud sylwadau ar eu byrddau. 

I ba ddiben wnaethoch chi ddefnyddio'r offer/adnodd? 

Defnyddir y bwrdd trafod fel llwyfan i grŵp rhyngbroffesiynol bach (4) o fyfyrwyr rannu tystiolaeth y maent wedi’i darllen ar 4 thema allweddol mewn ymarfer gofal iechyd (Gofal Person-Ganolog, Gweithio mewn Tîm, Cydweithrediad Rhyngbroffesiynol ac Atebolrwydd Proffesiynol). Cânt eu hannog i edrych ar dystiolaeth o'u maes eu hunain fel bod pawb yn cael golwg ehangach ar y pwnc, yn hytrach na safbwynt eu maes eu hunain yn unig. Mae hyn yn eu galluogi i gymharu a chyferbynnu'r tebygrwydd a'r gwahaniaethau o ran ethos a ffocws eu meysydd mewn perthynas â darparu gofal. 

Maent wedyn yn mynd ati fel grŵp i ddefnyddio'r byrddau i gyfansoddi traethawd 500 gair ar bob pwnc, cyn cyflwyno'r traethodau hyn ar y bwrdd. Mae hyn yn galluogi pawb i weld y traethodau trwy gyfnodau drafft a'r fersiwn derfynol wedi'i chwblhau, ac yn rhoi profiad iddynt o weithio gyda phobl eraill o ddisgyblaethau amrywiol, o bosibl wedi'u lleoli mewn gwahanol ardaloedd ar draws gogledd Cymru, i gwblhau tasg grŵp. Mae hyn yn bwysig gan fod llawer o gyrff proffesiynol bellach yn gofyn am y math hwn o asesiad fel rhan o'u disgwyliadau o ran hyfforddiant israddedig, er mwyn adlewyrchu realiti lleoliadau clinigol. 

Yn dilyn trafodaeth gyda gwasanaethau digidol, darganfyddais y byddai creu grwpiau ar wahân ar Blackboard yn gyntaf yn caniatáu i ddiwygio aelodau'r grŵp heb effeithio ar gynnwys bwrdd.  Mae'r broses hon hefyd yn golygu nad oes modd neilltuo myfyriwr i fwy nag 1 grŵp, a gallwch weld yn glir ar y diwedd a oes unrhyw fyfyrwyr cofrestredig ar y modiwl nad ydynt wedi cael eu neilltuo. Yna, gellir cymhwyso'r grwpiau hyn i agweddau eraill ar Blackboard, megis y byrddau trafod, profion neu hyd yn oed adnoddau. 

Yn yr un modd, symleiddiwyd y broses o osod bwrdd trafod gan y broses hon wrth i chi osod bwrdd sengl gyda'i nod agoriadol ac unrhyw gyfarwyddiadau i fyfyrwyr yr hoffech eu cynnwys cyn aseinio'r grwpiau. Ar ôl neilltuo myfyrwyr drwy glicio ar y bwrdd trafod, dim ond eu bwrdd grŵp penodedig y bydd ganddynt fynediad ato. Yn syml, mae'n rhaid i oruchwylwyr ddewis y grŵp y maent eisiau ei weld (rydym yn eu labelu ag enw'r goruchwyliwr a rhif y grŵp) i newid rhwng gwahanol grwpiau. Roedd hyn yn gwneud y gwaith o osod llawer cyflymach ac yn symleiddio'r wedd i staff a myfyrwyr. Dyletswydd y goruchwylwyr yw darparu tiwtorial hanner awr bob wythnos i’w grwpiau, a hefyd adolygu bwrdd trafod y grŵp unwaith yr wythnos i ddarparu sylwadau a chefnogaeth wrth iddynt weithio trwy eu hasesiad, gan gynnwys sylwadau ar ddrafftiau a chyfeiriadau at yr erthyglau sy’n cael eu trafod. 

Sut effeithiodd yr offer/adnodd ar eich addysgu?

Mae symleiddio'r bwrdd trafod i fyfyrwyr wedi golygu y gallwn dreulio llai o amser yn dangos i fyfyrwyr sut i gael mynediad at eu byrddau, a mwy o amser yn darparu addysg a chynnwys newydd i fyfyrwyr, yn ogystal â chynnig cefnogaeth ar faterion eraill. 

Mae’r myfyrwyr hefyd yn gallu dechrau defnyddio’r byrddau’n gynt i ddechrau ar eu hymchwil ar gyfer yr asesiad, yn ogystal â phenderfynu fel grŵp sut y byddant yn mynd ati i goladu’r holl wybodaeth i’w chyflwyno i’w gilydd yn ystod y broses, sydd ynddo’i hun yn sgil bwysig i’w datblygu ar gyfer eu gyrfaoedd academaidd a chlinigol. 

Pa mor dda y perfformiodd yr offer/adnodd: A fyddech chi'n ei argymell? 

Pan gaiff ei ddefnyddio'n gywir gan grŵp, mae hwn yn adnodd ac yn arf ardderchog i ganiatáu rhannu gwybodaeth a syniadau, yn enwedig pan nad yw cyswllt wyneb yn wyneb yn bosibl oherwydd pellter lleoliad neu ofynion sy'n gwrthdaro, sy'n gwneud cyfarfodydd cydamserol yn anoddach i’w trefnu. 

Mae’n ei gwneud yn ofynnol i’r grŵp weithio’n unol â’r set o ganllawiau, a lle mae grwpiau’n methu, mae goruchwyliwr yn goruchwylio er mwyn hyrwyddo ymlyniad â’r defnydd a argymhellir, e.e. darparu cyfeiriadau llawn at dystiolaeth sy’n cael ei thrafod, myfyrwyr yn darparu crynodeb i’r grŵp o’r dystiolaeth fel nad oes rhaid iddynt i gyd ddarllen pob erthygl, gan sicrhau bod y cyfathrebu ar y bwrdd yn barchus ac yn broffesiynol drwy’r amser. O ran priodoldeb cyfathrebu, caiff y byrddau eu sefydlu fel na all myfyrwyr ddileu unrhyw sylwadau a wneir, fel y gall goruchwylwyr ymchwilio i sylwadau amhriodol.  

Cyfyngiad arall ar yr offeryn hwn yw ei fod ond yn caniatáu i fyfyrwyr ryngweithio mewn modd anghydamserol ar sail testun. Nid yw ychwaith yn rhybuddio myfyrwyr yn y grŵp pan fydd eraill wedi postio ar y bwrdd, ac felly mae'n gofyn iddynt ei wirio'n rheolaidd neu fod â ffurfiau eraill o ddiweddaru ei gilydd ar y cynnydd. Yn amlwg, mae cyfyngiadau’n berthnasol i hyn, gan nad yw’n cipio sgyrsiau a ddigwyddodd oddi ar y bwrdd, naill ai ar Teams, wyneb yn wyneb neu systemau negeseuon eraill, er bod myfyrwyr hefyd yn ymwybodol, oni bai bod y rhyngweithiadau hyn yn cael eu crynhoi ar y bwrdd, na all eu goruchwyliwr gynnwys y gwaith grŵp hwn fel rhan o’r asesiad. Mae hyn yn annog myfyrwyr i ddarparu crynodebau o gysylltiadau eraill ar eu bwrdd. Mae ein myfyrwyr yn aml yn defnyddio cyfarfodydd Teams neu gyfarfodydd wyneb yn wyneb yn dilyn darlithoedd i ryngweithio ar lafar yn gydamserol, y maent yn aml yn ei weld yn allweddol i lwyddiant yr asesiad yn gyffredinol. 

Cyfyngiad arall yw, er bod y byrddau’n cynnwys opsiwn o gael eu marcio, nid yw'r system farcio hon ar hyn o bryd yn hidlo i'r llyfr graddau i'w goladu a’i drosglwyddo i’r tîm gweinyddu myfyrwyr. Rydych naill ai angen taflen farcio ar wahân y byddwch yn ei llenwi o'r byrddau, a all gynyddu gwallau, neu mae'n rhaid i chi gael porth cyflwyno ar wahân lle mae myfyrwyr yn uwchlwytho tudalen flaen er mwyn atodi marc y bwrdd trafod iddi. Mae'r ail opsiwn hwn yn caniatáu i fyfyrwyr rannu gwybodaeth PSLP a slipiau melyn gyda'r marciwr heb orfod hysbysu eu grŵp, sy'n amlwg yn rhywbeth cadarnhaol. Er hynny, gall byrddau gael eu cuddio'n awtomatig o hyd i atal ychwanegiadau pellach ar y dyddiad cyflwyno, yn union fel unrhyw borth asesu. 

Sut groeso gafodd yr offer /adnodd gan y myfyrwyr? 

Er bod myfyrwyr yn bryderus i ddechrau ynghylch yr asesiad hwn, gan mai hwn yw eu hasesiad cyntaf ar ddechrau'r cwrs, maent yn addasu'n gyflym iddo, ac mae'r rhan fwyaf yn ei ddefnyddio'n effeithiol. Mae llawer o fyfyrwyr yn mynd ymlaen i ffurfio cwlwm cryf rhyngddynt eu hunain ac aelodau eraill y grŵp, ac yn parhau i ddysgu oddi wrth ei gilydd a chefnogi ei gilydd wrth iddynt symud ymlaen trwy eu gyrfa, hyd yn oed pan fyddant yn symud yn ôl i addysgu disgyblaeth-benodol. 

Rhannwch 'Awgrym Da' i gydweithiwr sy'n newydd i'r offer/adnodd 

Mae hon yn enghraifft wych o ddefnyddio adnoddau technoleg gwybodaeth/digidol i oresgyn pellter a gofynion cystadleuol i hwyluso gwaith grŵp rhwng grwpiau myfyrwyr rhyngbroffesiynol. 

Deunyddiau darllen a argymhellir: 

Byrddau Trafod Blackboard: 

 

Cyswllt am ragor o wybodaeth: 

Becky Moseley: b.moseley@bangor.ac.uk

Tîm Cefnogi Dysgu ac Addysgu: helpdesk@bangor.ac.uk